Germaniya terma jamoasida o'zgarish: Julian Nagelsmann iste'foga chiqdi
Germaniya yana bir bor jahon chempionatidan erta uchib ketdi. Bu safar oqibat yanada og‘ir bo‘ldi: bosh murabbiy Julian Nagelsmann iste’foga chiqdi.
Bir nechta yirik nemis nashrlari xabariga ko‘ra, Nagelsmann Germaniya futbol ittifoqi (DFB) bilan shartnomasi 2028 yilgi Yevropa chempionatigacha amal qilayotganiga qaramay, lavozimini tark etishga rozi bo‘ldi. DFB undan ketishni so‘radi, u esa bu taklifni qabul qildi.
Bu qaror Germaniya terma jamoasining Jahon chempionatida Paragvayga qarshi 1/16 finaldagi shok mag‘lubiyatidan so‘ng qabul qilindi. Boston shahrida 1:1 hisobidagi durang va qo‘shimcha daqiqalardan keyin ish 11 metrlik zarbalarga qoldi, seriya esa nemislar uchun tarixiy qulashga aylandi: Germaniya ilk bor jahon chempionatida penaltilarda yutqazdi.
Frankfurtdagi uch soatlik uchrashuv va yetti millionlik chiziq
Nagelsmann taqdiri hal bo‘lgan uchrashuv Frankfurt shahridagi DFB shtab-kvartirasida bo‘lib o‘tdi. Taxminan uch soat davom etgan majlisda unga bir yil maoshiga teng bo‘lgan, qariyb yetti million yevrolik tovon puli taklif qilingani aytilmoqda.
38 yoshli murabbiy bu bilan Germaniya futboli tarixida ikkinchi bo‘lib ishdan bo‘shatilgan terma jamoa bosh murabbiyiga aylanadi. Birinchi misol – uning o‘zi o‘rniga kelgan Hansi Flick, 2023 yilda iste’foga chiqarilgandi.
Nemis futboli uchun bu oddiy almashuv emas, butun davr tugayotganiga o‘xshaydi. 2014 yilda Braziliyada Argentina ustidan qozonilgan final g‘alabasidan beri terma jamoa Jahon chempionatida bitta ham pley-off o‘yinida g‘alaba qozona olmadi, hatto bitta ham “quruq” o‘yin o‘tkazmadi.
Ketma-ket qulashlar: 2018, 2022 va endi yana bir zarba
Rossiya-2018 va Qatar-2022 – Germaniya uchun eslashni istamaydigan sahifalar. Har ikkala mundialda ham terma jamoa guruh bosqichidayoq uyga qaytgandi. Endi esa nihoyat pley-offga chiqqanida, Paragvayga qarshi penaltilar seriyasida yiqildi.
To‘rt karra jahon chempioni bo‘lgan mamlakat uchun bu natijalar qabul qilib bo‘lmas darajada og‘ir. Bir paytlar turnirlar favoriti bo‘lgan, bosimi, intizomi, mentaliteti bilan raqiblarni sindiradigan Germaniya endi o‘zi bosim ostida sinyapti.
Shu fon’da Nagelsmannning ketishi nafaqat sportiy, balki ramziy qarorga aylandi. DFB endi butun loyihani qaytadan qurishga majbur.
Jurgen Klopp soyasi Germaniya ustida
Nagelsmann ketishi bilan bir savol darhol kun tartibiga chiqdi: endi kim keladi?
DFB ichkarisidan kelayotgan xabarlarga ko‘ra, asosiy nomzod – Jurgen Klopp. Sobiq Liverpool bosh murabbiyi 2024 yilda klubni tark etganidan beri katta futbol maydonidan chetga chiqdi, ammo futbol olamidan emas. Hozir u Red Bull tizimida global futbol bo‘yicha rahbar sifatida ishlayotgani aytiladi va xabarlarga ko‘ra, Germaniya terma jamoasini qabul qilib olish imkonini beradigan maxsus shart bandi bor.
59 yoshli Klopp Germaniyada hanuz juda mashhur. Jahon chempionati davomida u nemis telekanallarida ekspert sifatida muntazam ko‘rinish berib turdi, uning har bir fikri, har bir hazili muhokama qilindi. Endi esa u faqat studiyada emas, texnik zona chizig‘i bo‘ylab yugurib yurishi mumkinligi haqida gaplar kuchaymoqda.
Klopp – DFB uchun orzu variantiga o‘xshaydi: xarizmatik, yirik final va chempionliklar ko‘rgan, jamoaga ruh va identitet bera oladigan murabbiy. Ammo u bu chaqiriqqa rostdan ham “ha” deydimi? Bu savol hozircha ochiq.
Germaniya qayerga qarab ketmoqda?
Nemis futboli o‘tgan o‘n yillikda o‘zini yo‘qotib qo‘ygandek. 2014 yildagi cho‘qqidan so‘ng – ketma-ket uchta mundialda izdan chiqqan tizim, bosimga dosh bera olmayotgan avlod va endi yana bir murabbiy almashinuvi.
Nagelsmannning iste’fosi – bu faqat natijalar uchun javob berish emas, balki butun konsepsiyani qayta ko‘rib chiqish zarurati haqida signal. DFB endi nafaqat yangi murabbiy, balki yangi yo‘l tanlashi kerak bo‘ladi.
Jurgen Klopp bu yo‘lning boshlanishi bo‘ladimi yoki Germaniya boshqa variant izlaydimi – javob tez orada ma’lum bo‘ladi. Ammo bir narsa aniq: to‘rt karra jahon chempioni endi o‘tmishdagi obro‘siga tayanib yashay olmaydi. Endi haqiqiy qaytish yoki yanada chuqurroq inqiroz o‘rtasida tanlov qilish vaqti keldi.
