Jorge Salinas: Barcelona va Racing Santander o‘rtasidagi kurash
Yozgi transfer oynasi boshidan beri bir ism atrofida shovqin tinmayapti: Jorge Salinas. Racing Santanderning yosh himoyachisi, Ispaniya U-19 terma jamoasidagi o‘yinlari bilan o‘zini ko‘rsatib bo‘ldi va endi katta sahnaga chiqish yoqasida turibdi.
Bu yoqada esa Barcelona bor. Ammo yo‘lning o‘rtasida katta to‘siq paydo bo‘ldi.
Bozor bahosi: 16 million yoki hech narsa
Cataloniyaliklar yoz boshida Salinas bilan qiziqa boshladi, hatto shartlar borasida futbolchining o‘zi bilan kelishuvga ham erishgan. Lekin asosiy jang stol atrofida – Racing bilan.
Klublar o‘rtasidagi kelishmovchilik shartnomadagi tovon puli bandidan boshlandi. Barcelona bu raqamni qayta talqin qilishga urinib ko‘rdi, Racing esa bir qadam ham chekinmadi. Klub pozitsiyasi aniq: 16 million yevro.
SPORT nashri keltirgan ma’lumotga ko‘ra, Racing sport direktori Chema Aragon allaqachon 14 million yevrolik taklifni rad etishganini ochiq aytdi:
“Bizga 14 million yevro taklif qilishdi va biz yo‘q dedik.”
Qaysi klub bu taklifni bergani ochiqlanmadi, lekin signal juda ravshan: bozor narxi muhokama qilinmaydi.
Aragon pozitsiyani yana bir bor mustahkamladi:
“Kimdir kelib, 16 millionni qo‘yib bersa va futbolchining o‘zi ham o‘sha klubni xohlasa, u ketadi.”
Shart oddiy. Ammo qattiq.
Barcelona taklifi yetmadi
Barcelona Salinasni iyundan beri yaqindan kuzatib kelmoqda. Shartlar bo‘yicha futbolchining roziligi bor, lekin Racingni ishontirish – boshqa masala.
Kataloniyaliklarning dastlabki taklifi: 6 million yevro kafolatlangan, 2 million bonuslar ko‘rinishida va ustiga ustak, bir futbolchini ijaraga berish varianti. Racing uchun bu yetarli bo‘lmadi. Klub nafaqat summani past deb bildi, balki bitimga futbolchi qo‘shish g‘oyasini ham ma’qullamadi.
Chema Aragon bu borada ham qat’iy gapirdi:
“Ehtimol, biror futbolchiga qiziqishimiz bor, lekin bu boshqa masala bo‘ladi. Ikki operatsiyani aralashtirmaymiz.”
Ya’ni, Salinas uchun faqat naqd pul. Hech qanday almashinuv, hech qanday paketli bitim yo‘q.
Deadline yaqinlashar ekan, narx tushmaydi – ko‘tarilishi mumkin
Ko‘pincha bozor yopilishiga yaqin klublar narxni tushiradi, shoshadi, yon beradi. Racing esa aks yo‘nalishda ketishga tayyor.
Aragonning so‘zlari Racingning kayfiyatini ochiq ko‘rsatadi:
“Bugun u faqat 16 millionga sotiladi. Ertaga, agar imkon bo‘lsa, 16,1 millionga. Bozor yakuniga qancha yaqinlashsak, talablarimiz shuncha oshadi.”
Bu faqat raqamlar bilan o‘ynash emas. Racing o‘z qo‘lida qanday futbolchi borligini juda yaxshi biladi va undan oxirgi sentgacha olish niyatida.
Barcelona uchun qimmat tajriba yoki yo‘qotilgan imkoniyat?
Barcelona moliyaviy jihatdan hanuz ehtiyotkor bo‘lishga majbur. 19 yoshli, yuqori potensialga ega, lekin yuqori darajada hali o‘zini to‘liq isbot qilmagan himoyachi uchun 16 million yevro – jiddiy qaror.
Klub Salinasni juda xohlaydi. Lekin hozirgi sharoitda bunday sarmoya amaliy jihatdan unchalik mantiqli ko‘rinmaydi. Ayniqsa, boshqa pozitsiyalarda ham kuchaytirish zarur bo‘lgan paytda.
Racing pozitsiyasini o‘zgartirmasa, bu yozda transfer amalga oshmasligi tobora aniq bo‘lib bormoqda. Bunday vaziyatda Barcelona uchun eng oqilona yo‘l – Salinasni Racingda qoldirish, uning Segunda yoki La Liga sahnasidagi o‘sishini diqqat bilan kuzatish va keyinroq qayta urinish bo‘lishi mumkin.
Ammo shunday savol ochiq qoladi: agar Salinas bu mavsumda haqiqatan ham portlasa, keyingi safar uning narxi 16 millionda qoladimi?
