Mark Zuckerberg va UFC yulduzlari: Ko‘l O‘rtasidagi Jangovar Mashg‘ulotlar
Mark Zuckerberg o‘zining g‘ayrioddiy mashg‘ulotini yana qaytardi: ko‘l o‘rtasida suzib yurgan pontonda UFC chempioni bilan jangovar mashg‘ulot.
Yakshanba kuni u Instagram’da video joylashtirdi. Kadrlarda u 2024 yilgi UFC Bantamweight chempioni, gruziyalik jangchi Merab Dvalishvili bilan sparring qilayotgani ko‘rinadi.
Dronlardan olingan rakurslar, turli burchaklardagi tasvirlar — hammasi bir videoda jamlangan. Zarba, low-kick, yiqitish mashqlari. Orqa fonda esa Macklemore va Ryan Lewis’ning "Can’t Hold Us" kompozitsiyasining instrumental varianti yangraydi, sahnaga deyarli promorolik kayfiyat beradi.
Bir payt Zuckerbergning rafiqasi Priscilla Chan kanoeda yonlaridan eshkak eshib o‘tib qoladi. Shu lahzada u hazil aralash shunday deydi: Merab uni “jangchiga o‘xshabroq ko‘rinishi” uchun futbolkasini yechishga majbur qilganini aytadi.
Bu Zuckerbergning pontondagi birinchi “dueli” emas. U deyarli uch yil avval ham shunday videoni ulashgan, o‘shanda u yana ikki UFC chempioni — Alexander Volkanovski va Israel Adesanya bilan sparring qilgandi.
Zuckerberg jiu-jitsu bilan pandemiya davrida shug‘ullana boshlagan. U 2023 yilda haftasiga uch-to‘rt marta mashq qilishi haqida gapirgandi. Vaqt o‘tishi bilan u ko‘plab professional jangchilar bilan yaqinlashib, do‘stona aloqalar o‘rnatdi.
2024 yilda u Volkanovski janglaridan birida uning burchagida ham ko‘rinish bergan. O‘sha paytdagi noqulay, nimani qilishni bilmay turgandek holati internetda memga aylangan: boshqa burchakdagilar jihoz uzatayotgan bir paytda u faqat bosh irg‘ab, qo‘lini cho‘zib turgani uchun masxarali izohlar ko‘paygandi.
Yangi videoga jangovar sport afsonalaridan biri ham befarq qolmadi. Sobiq UFC light-heavyweight va heavyweight chempioni Jon Jones post ostida fikr qoldirdi: Zuckerbergning shaklini maqtadi, uning anchadan beri jiddiy mehnat qilayotganini ko‘rish mumkinligini yozdi.
Eng yuqori baholangan izoh esa ijtimoiy tarmoqlarda allaqachon alohida syujetga aylangan raqobatni eslatdi: “Elon anchadan beri juda jim”, — deya hazillashadi foydalanuvchi. Bu, albatta, Zuckerberg va Elon Musk o‘rtasidagi mojaro, 2023 yilda tilga olingan ehtimoliy jang haqida. O‘sha paytda jang arenasi sifatida hatto Rimdagi Colosseum ham tilga olingandi, lekin bu “superjang” hech qachon real hayotga ko‘chmadi.
Shu bilan birga, bunday mashg‘ulotlar xavfsiz emas. Ayniqsa, bozor qiymati 1,5 trillion dollar bo‘lgan kompaniya rahbari uchun. Bir noto‘g‘ri yiqilish, bir og‘ir zarba — va bu nafaqat shaxsiy sog‘liq, balki ulkan texnologik imperiyaning kundalik ishlariga ham ta’sir qilishi mumkin.
Zuckerberg esa hozircha xavfni hisobga olgan holda ham pontondagi sparringlardan voz kechayotgani yo‘q. U ringga chiqmaydi, lekin jang maydoniga juda yaqin turishni tanlayotganga o‘xshaydi. Savol esa ochiq qoladi: texnologiya gigantlari orasidagi bu “jang” ertaga haqiqiy oktagonga ko‘chadimi yoki hammasi ijtimoiy tarmoqlardagi videolar bilan cheklanib qoladimi?
