Morgan Rogers transferi: Arsenal va Chelsea o‘rtasidagi kurash
“Emirates”dagi yozgi reja bir kunda ag‘darildi. “Arsenal” o‘ylab, hisob-kitob qilib yurgan paytda, “Chelsea” Morgan Rogers borasida eshikni tepib ochdi va bitimni qo‘lidan tortib oldi.
Bu haqda bozorni ichidan kuzatib boradigan Fabrizio Romano gapirdi. Uning aytishicha, “Arsenal” yoz bo‘yi Aston Villa hujumchisi bilan oldinga chiqib olgan, shaxsiy shartlar bo‘yicha kelishuvga erishilgandek ko‘ringan. Mikel Arteta Rogers bilan bir necha oy davomida bevosita suhbatlar o‘tkazgan, uni hujum chizig‘ida ham, “o‘nlik” pozitsiyasida ham ishlata olishiga ishongan.
Lekin Londonning ko‘k tomoni sabr qilgani yo‘q.
“Chelsea”ning 24 soatlik zarbasi
Romano o‘z kanalida shunday deydi: kelasi 24 soat – bu Morgan Rogers uchun “Chelsea” davrining boshlanishi bo‘ladi. Bitim allaqachon kelishib bo‘lingan, hujjatlar almashinuvi boshlangan, dushanba kuni imzo qo‘yiladi, xolos.
Raqamlar ham kamtar emas. “Chelsea” Rogers uchun 117 million funt to‘lashga rozi bo‘ldi. Olti yillik shartnoma, ustiga-ustak yana bir yilga uzaytirish opsiyasi. “Arsenal” esa narxni tushirishga urinayotgan, ichida 90 million atrofida, eng ko‘pi bilan 100 milliongacha borishga tayyor edi. 117 million? Shimoldagi London klubi uchun chiziq aynan shu yerda chizilgan.
“Aston Villa buni ajoyib biznes deb biladi, “Chelsea” esa tarkibiga fantastik futbolchi qo‘shdik, degan fikrda”, – deydi Romano. Bir tomonda moliyaviy yutuq, ikkinchi tomonda esa agressiv transfer siyosati.
Bosim ostida qolgan tomon esa “Arsenal”.
Arteta rejasi buzildi
“Arsenal” uchun bu – “katta kutilmagan hodisa”, deydi Romano. Klub endi bozorda tezkor reaksiya ko‘rsatishi kerak. Arteta Rogersni jiddiy nishon sifatida ko‘rgan, uning moslashuvchanligi, turli hujum nuqtalarida o‘ynay olishi “Gunners” rejalarida muhim bo‘g‘in edi.
Shaxsiy shartlar? Muammo bo‘lmagan. Romano aynan shuni ta’kidlaydi: futbolchi bilan kelishuv oson kechdi, ammo “Aston Villa” bilan narx borasida kelisha olishmadi. Aynan shu paytda “Chelsea” kelib, hammasini bir zarbada hal qildi. Klub “hammasini bir kartaga tikish” yo‘lini tanladi va bitimni 24 soat ichida yopib, ehtimoliy “Arsenal” javob zarbasiga yo‘l qoldirmadi.
Transfer oynasida bir soniya ikkinchisiga teng emas. Bu safar tezkorlikni “Stamford Bridge” tomoni ko‘rsatdi.
Endi nigohlar Yan Diomande tomonda
Rogers qo‘ldan ketdi. “Arsenal” esa allaqachon yangi yo‘nalishga burildi. Romano ma’lumotiga ko‘ra, “Gunners” RB Leipzig vingeri Yan Diomande bo‘yicha so‘rov yuborgan. Bu poygada esa hozircha yetakchi boshqa klub.
Romano: “Yan Diomande’ga diqqat bilan qarab boring”, – deydi. Uning aytishicha, Paris Saint-Germain futbolchi bilan shaxsiy shartlar borasida og‘zaki kelishuvga ega. Uch-to‘rt haftadan beri bu kelishuv kuchda. Biroq PSG hali RB Leipzig bilan moliyaviy kelishuvni yopgani yo‘q.
Klublar o‘rtasidagi munosabatlar iliq – Xavi Simons va boshqa bitimlardan keyin aloqalar yaxshi, lekin bu narx bo‘yicha savdolashuvni osonlashtirmaydi. Futbolchi bilan kelishib olish – yarim ish. “Arsenal” va Morgan Rogers misolida buni bozor yana bir bor ko‘rsatdi: shaxsiy shartlar hal bo‘lganda ham, boshqa klub kelib, hammasini o‘zgartirib yuborishi mumkin.
Diomande atrofida hozir shunday manzara. PSG – favorit. Lekin Romano ma’lumotiga ko‘ra, har kuni yangi klublar qo‘ng‘iroq qilmoqda, poygaga kirish imkoniyatini so‘ramoqda. So‘nggi kunlarda “Arsenal” ham shunday qilgan, fon ortida boshqa jamoalar ham harakatda.
Endi navbat Parij klubida. PSG Leipzig bilan kelishuvni yopadimi yoki “Chelsea” Rogersda qilgan ishni bu safar boshqa klub Diomande bo‘yicha takrorlaydimi? Savolga javob yozgi oynaning eng keskin lahzalaridan biriga aylanishi mumkin.
