Nicky Butt: Tuchel o‘z rejasi bilan xavfga duch kelmoqda
Angliya terma jamoasining o‘yinlari atrofidagi bahslar tinmayapti. Endi sahnaga sobiq yarim himoyachi Nicky Butt chiqdi va Thomas Tuchel qarorlarini keskin tahlil qildi. Uningcha, nemis mutaxassisi o‘z rejasi bilan yashab, atrofdagi ovozlarni butunlay o‘chirib qo‘ygan – bu esa natijaga qarab ham maqtov, ham portlash olib kelishi mumkin.
"O‘ziga ishongan, lekin haddan tashqari qaysar"
Butt Tuchel xarakterini bir jumlada jamladi: qat’iyatli, lekin o‘jar.
"U o‘zi xohlaganini qiladi, media, muxlislar haqida o‘ylamaydi. O‘ziga xos tarzda qaysar," – deya tushuntiradi u. "Agar shu yo‘l bilan yutib chiqsa, hech kim e’tiroz bildirmaydi. Uni qahramonga aylantirishadi. Lekin baribir xavotirli jihati bor."
Buttning fikricha, Tuchelning o‘zi bilan o‘zi bo‘lib yashashi murabbiy uchun ba’zan afzallik, ba’zan esa xavf.
"U shunchaki hamma narsani o‘zi biladigan, biroz mag‘rur murabbiy ko‘rinishida. O‘zi xohlaganini qiladi. Bu yomon emas, murabbiy uchun yaxshi sifat ham. Rejasi bor va unga yopishib olgan, atrofdagi shovqinlarni mutlaqo pisand qilmaydi."
Natija bo‘lmasa, aynan mana shu qaysarlik nishonga aylanadi.
"Bu tarkib noto‘g‘ri – menimcha, bu aniq"
Butt eng katta zarbani tarkib tanloviga berdi. Uningcha, Tuchel muhim pallada o‘yin taqdirini o‘zgartira oladigan futbolchilardan voz kechgan.
"Kim nima desa desin, tarkib noto‘g‘ri," – deydi u. "Ich-ichida u buni tan olmasa ham, Trent Alexander-Arnoldni olish kerakligini biladi, yuz foiz. 0:0 hisobda o‘yin tugashiga 15 daqiqa qolganida, skamyaga qarab, zaxirada Phil Foden yoki Cole Palmer bo‘lishini istagan bo‘ladi."
Butt ogohlantiradi: agar sovrin kelmasa, zarba og‘ir bo‘ladi.
"Agar yutolmasa, uni juda qattiq tanqid qilishadi, juda qattiq. Ko‘p qarorlarini umuman tushunmayman. Biroz betartiblik."
Kobbie Mainoo – ishonch ko‘rmayotgan iste’dod
Buttni eng hayratga solgan masala – Kobbie Mainoo atrofidagi vaziyat. Manchester United yoshlik yulduzi deyarli maydonga tushmayapti, bu esa sobiq yarim himoyachini chindan ham bezovta qilgan.
"Eng tushunmayotgan narsam – nega u Kobbie Mainoo’ni hech qanaqasiga o‘yinga kiritmayapti," – deydi u. "Umuman tushunmayman. Uch daqiqa bo‘lsa ham bermayapti. Jordan Hendersonni undan oldin tushirdi – bu yerda nimadir tubdan noto‘g‘ri."
Buttning fikricha, bu qarorlar bitta narsani ochib qo‘yyapti: murabbiy orqa chiziqqa ishonmaydi.
"Ko‘rinib turibdi, Tuchel orqa to‘rtligiga ishonmaydi, shu sabab ikkita ‘anchov’ yarim himoyachini birga qo‘yib o‘ynatyapti. Congo kabi jamoaga qarshi bunday ehtiyotkorlik – bu aqldan ozish. Aynan mana shunday o‘yinlarda Kobbie Mainoo maydonga tushishi kerak edi. Ghana, Panama, Congo kabi raqiblarga qarshi u albatta o‘ynashi lozim edi."
Markazdagi juftlik: Rice charchagan, Anderson xavfsiz o‘ynayapti
Butt uchun yana bir savol – Declan Rice va Elliot Anderson juftligi. Uningcha, bu markaz ijodkorlikdan yiroq va raqibni sindirishga yetarli emas.
U Tuchelning bir qarorini alohida eslatdi: eng yaxshi yarim himoyachini orqa chiziqqa surishni.
"Thomas Tuchel o‘tgan mavsum Yevropadagi eng yaxshi yarim himoyachilardan biri bo‘lgan futbolchimizni o‘ng qanot himoyachisiga o‘tkazdi, chunki o‘sha pozitsiyada muammo juda yaqqol edi," – deydi Butt. "Shu bilan birga, Declan Rice aniq jarohat bilan o‘ynayapti. Uning to‘liq sog‘ ekaniga ishonishning iloji yo‘q, shunday bo‘lsa, nega uni almashtirmadi, dam bermadi – oldinda undan ham katta o‘yinlar kutib turibdi."
Elliot Anderson esa Butt ko‘zida xavfsiz, lekin befoyda futbol o‘ynayapti.
"Elliot Anderson yaxshi bo‘layotgani yo‘q va DR Congo’ga qarshi ham yaxshi o‘ynamadi. U biroz to‘xtab qoldi, juda orqaga tushib ketayapti, to‘pni noto‘g‘ri hududlarda oladi, yetarlicha oldinga o‘ynamaydi, chiziqlarni yorib o‘ta olmaydi."
Buttning tanqidi bir nuqtaga borib taqaladi: Tuchelning rejasi bor, lekin bu reja hamma narsadan ustun qo‘yilgan. Agar natija kelmasa, aynan shu qat’iyat Angliya uchun mavsum yakunida eng og‘ir savollarga sabab bo‘ladi.
