Zidan Fransiya terma jamoasini boshqaradi: yangiliklar va murabbiylar shtabi
Fransiya futbol federatsiyasi payshanba kuni nihoyat hammaga qiziq bo‘lgan savolga nuqta qo‘ydi: Zinedin Zidan terma jamoa bilan kimlar bilan ishlaydi? Rasmiy bayonot bilan birga, uning murabbiylar shtabi tarkibi ham tasdiqlandi. Endi Zidan rasman Didier Deschamps o‘rnini egallagan, endi esa yonida kimlar turishi ham ma’lum.
To‘liq ro‘yxat matbuot oldida sentabr boshida taqdim etiladi. Bu — 28 iyuldagi taqdimot kunidayoq chizib qo‘yilgan rejaning davomidir. Zidan va FFF hammasini bosqichma-bosqich, shoshmasdan, lekin aniq rejaga ko‘ra amalga oshiryapti. FFF prezidenti Philippe Diallo esa barcha tayinlovlarni to‘liq Zidan takliflariga tayangan holda ma’qulladi. Bu endi haqiqiy “Zidan jamoasi”.
Barthez qaytdi: darvozabonlar qo‘lida afsona
Eng ko‘zga tashlanadigan yangilik – Fabien Barthezning qaytishi. Sobiq terma jamoa darvozaboni endi Fransiya posbonlari uchun mas’ul murabbiy bo‘ladi. U yana eski sherigi qo‘l ostida ishlaydi.
Zidan va Barthez bir paytlar “Les Bleus” safida tarix yozgan. Endi esa o‘sha tajriba, o‘sha ruh yana bazaga qaytyapti. Ularning duetini ko‘rgan har qanday fransuz muxlisi uchun bu shunchaki murabbiylik tayinlovi emas – bu o‘tmishdagi g‘alabalar bilan hozirgi avlod o‘rtasidagi ko‘prik.
Shu fon’da bitta ismning yo‘qligi ko‘zga tashlanadi: Bernard Diomede. U dastlab shtabga qo‘shilishi kutilgan edi, ammo yakuniy ro‘yxatda paydo bo‘lmadi. Zidan tanlov qilishi kerak edi – u qildi. Diomede esa bu safar chetda qoldi.
Bettoni – ishonchli qo‘l, Msaidie – taktik kuchaytirish
Zidan yoniga eng ishonchli hamkorlarini yig‘di. David Bettoni – kutilgan tayinlov. U Real Madrid davridan buyon Zidan bilan yonma-yon ishlagan, uch marta Chempionlar Ligasi yutgan murabbiylik tandemi yana birlashdi. Endi bu tajriba Fransiya terma jamoasiga xizmat qiladi.
Hamidou Msaidie ham yordamchi murabbiy sifatida shtabga qo‘shildi. Bu qaror taktik blokni yanada mustahkamlashga qaratilgan. Zidan atrofida faqat tanish yuzlar emas, balki g‘oya va tahlil olib kiradigan mutaxassislar jamlanmoqda.
Stephane Plancque skaut va taktik kuzatuvchi sifatida tayinlandi. U raqiblarni o‘qiydigan, maydon tashqarisidagi janglarni olib boradigan odam bo‘ladi. Bugungi elita futbolida bunday rol ko‘pincha soyada qoladi, lekin natija ko‘p jihatdan aynan shunday mutaxassislarga bog‘liq.
Gregory Dupont esa strategiya va jismoniy tayyorgarlik bo‘yicha bosh maslahatchi sifatida ishlaydi. Uning vazifasi oddiy emas: o‘yin uslubini, yuklamani va futbolchilarning holatini bir chiziqqa tushirish. Zidan murabbiy sifatida maydonda qaror qabul qilsa, Dupont kulis ortida o‘sha qarorlar uchun zarur bo‘lgan “motor”ni sozlaydi.
Texnik shtabni yana ikki muhim bo‘g‘in to‘ldiradi: yordamchi murabbiy va ma’lumotlar bo‘yicha video tahlilchi Farid Tabet hamda yordamchi video tahlilchi Clement Ybert. Ular o‘yinni kadrma-kadr tahlil qiladi, raqamlar va videoni futbolchiga tushunarli, murabbiyga foydali qurolga aylantiradi.
Davlat bilan bog‘lovchi bo‘g‘in va tibbiy shtab
FFF tez orada shtabga alohida aloqa xodimi ham qo‘shilishini ma’lum qildi. Bu lavozim Fransiya Ichki ishlar vazirligi bilan rasmiy kelishuv asosida belgilanadi. Terma jamoa endi nafaqat sport, balki tashkilot va xavfsizlik nuqtai nazaridan ham yuqori darajada boshqarilishini ko‘rsatadigan qadam.
Maydondagi yulduzlar uchun esa boshqa bir jamoa allaqachon tayyor: tibbiyot bo‘limi. Dr Herve Collado tibbiy shtabni boshqaradi. Uning atrofida esa o‘z sohasining mutaxassislari: osteopat Philippe Boixel, podiatrist Marc Retali, fizioterapevtlar Maxime Matton va Paul Olive. Har bir mayda jarohat, har bir charchoq, har bir tiklanish jarayoni – endi ularning qo‘lida.
Bu – tasodifiy yig‘ilgan guruh emas. Bu – aniq tuzilgan, har bo‘g‘ini o‘ylangan murabbiylar va mutaxassislar zanjiri.
Zidan va uning yangi shtabi endi kutib o‘tirmaydi. Ularni oldinda hal qiluvchi xalqaro o‘yinlar kutyapti. Savol bitta: bu qayta qurilgan “Les Bleus” yana bir avlodni g‘alabalarga yetaklay oladimi?
