Bradley Barcola transferi: Liverpool, PSG va Manchester United harakatda
Bradley Barcola yozgi bozor markaziga aylanyapti. Bir tomonda Mohamed Salah o‘rnini to‘ldirishga majbur bo‘lgan Liverpool, ikkinchi tomonda esa ingliz klublaridan maksimal daromad olishni ko‘zlayotgan Paris Saint-Germain. Manzara sodda emas, narxlar esa yanada murakkab.
Salah ketdi, Liverpoolga qanot kerak
Andoni Iraola qo‘l ostidagi Liverpool uchun bu yoz oddiy transfer oynasi emas. Salah ketgan, o‘ng qanot bo‘shab qolgan, Anfield esa darhol yuqori sifatli hujumchi talab qilmoqda. Klub ichkarisida Barcola allaqachon birinchi raqamli nishon sifatida ko‘rilmoqda.
Uzoq vaqtdan beri skautlar uning o‘yinini kuzatib keladi, nomi Liverpool ro‘yxatlarida anchadan beri turibdi. Klub ichidagi manbalar shoshilmayapti, lekin ishonch baland: yoz yopilguncha yana bir nechta muhim transferlar bitishi kerak, Barcola esa shu rejadagi asosiy bo‘laklardan biri.
Shartlar masalasi? Shaxsiy kelishuv bo‘yicha muammo kutilmayapti. Futbolchining o‘zi ham Anfield variantiga iliq qarayotgani aytilmoqda.
PSGda raqobat kuchaydi, daqiqalar kamaydi
Barcola Parijda o‘zini xavfsiz his qilmayapti. U Luis Enrique bilan o‘yin vaqti bo‘yicha xavotirlarini allaqachon ochiq gapirgan, ichkarida bu mavzu bir necha haftadir muhokamada.
Sababi aniq: u endi Ousmane Dembele, Khvicha Kvaratskhelia va Desire Doue ortida turibdi. Ustiga ustak, Maghnes Akliouche kelishi kutilmoqda, Yan Diomande bo‘yicha ham muzokaralar ketmoqda. Qanot va “o‘nlik” zonalarida raqobat haddan tashqari zichlashmoqda.
Bunday sharoitda 23 yoshli futbolchi yangi sahifa ochishni istashi tabiiy. U muntazam asosiy tarkibda o‘ynashni xohlaydi va Parijda bu kafolatlanmagan.
PSG auktsion o‘ynayapti
Eng qiziq nuqta shu yerda. Fransiyadagi xabarlarga ko‘ra, PSG Liverpool bilan stolda o‘tirib, muzokara boshlash o‘rniga, bir nechta top-klublarga “eshik ochib qo‘ygan”.
RMC Sport ma’lumotiga ko‘ra, Manchester United, Arsenal, Liverpool, Man City, Bayern Munich va Barcelona kabi klublarga Barcola bo‘yicha taklif berish uchun “rasmiy taklif” yo‘li ochilgan. Ya’ni, Parij klubi ataylab auktsion muhitini yaratmoqchi.
Boshlang‘ich narx sifatida 70 million yevro atrofidagi summa tilga olinmoqda. Ammo bu raqam TEAMtalk manbalari aytayotgan talabdan ancha past.
Narx – asosiy to‘siq
PSG ichida Barcola hali ham juda yuqori baholanadi. Luis Enrique ham, sport maslahatchisi Luis Campos ham uni kelajak o‘yinchisi deb biladi. Shuning uchun klub “oson chiqish” variantini rad etyapti.
Ingliz bozoridagi bu yozgi narxlarning shishganini ko‘rgan Parij rahbariyati ichkarida boshqa raqamni aylantiryapti: 150 million yevro. Shunday summa bo‘lmaguncha, rasmiy ravishda “sotilmaydi” pozitsiyasi saqlanib qolmoqda.
Ochiq bayonotlarda ham klub Barcola bozorga qo‘yilmaganini ta’kidlayapti. Lekin kulis ortida boshqa o‘yin ketmoqda.
Futbolchining vakillari bir necha haftadan beri uning kelajagi ustida ishlayapti, Yevropaning yirik klublari bilan uchrashuvlar bo‘yib o‘tgan. Transfer bo‘yicha ma’lumotlari bilan tanish bo‘lgan Graeme Bailey fikricha, agar Barcola yangi shartnomaga imzo chekishdan bosh tortishda davom etsa, ikki yilga ham yetmaydigan amaldagi kelishuv fonida PSG oxir-oqibat uni sotishga majbur bo‘ladi.
Moliyaviy qoidalar ham bosimni kuchaytirgan. Klub ayrim futbolchilarni sotish orqali balansni tiklashga urinmoqda, Barcola esa o‘zi ham muntazam o‘yin amaliyoti uchun Parijni tark etish istagini yashirmayapti. Bu kombinatsiya transfer ehtimolini yanada oshiradi.
Manchester United – taklif bor, lekin shart ham bor
PSG Manchester United’ga ham yo‘l ochgani haqida xabarlar bor. Savol: “Qizil iblislar” bu imkoniyatdan foydalanadimi?
Bu yerda bitta katta “agar” turibdi. Klub ichkarisidagi manbalarga ko‘ra, yangi chap qanotchi uchun jiddiy yurish faqat bitta shart bilan bog‘langan: Marcus Rashford’ni sotish.
Barcelona varianti Rashford uchun amalda yopilgan, uning Kataloniyaga doimiy ko‘chib o‘tish orzusi so‘nib qoldi. Hozircha Manchester United uni qayta jamoaga qo‘shishga, 28 yoshli hujumchini qayta tiklashga tayyorgarlik ko‘ryapti.
Demak, Barcola bo‘yicha Unitedning qat’iy harakati – hozircha savol ostida.
Liverpoolning rejasi va Iraola talablari
Liverpool esa ortga qaramayapti. Klub ichida Barcola uzoq vaqtdan beri kuzatilgani, unga bo‘lgan qiziqish yangi emasligi aytiladi. Ichki kayfiyat xotirjam: vaqt bor, imkoniyatlar ham.
Ba’zi xabarlarga ko‘ra, yakshanba kuni Anfield klubi allaqachon rasmiy taklif yuborgan bo‘lishi mumkin. Raqamlar ochiqlanmagan, lekin bozor holatidan kelib chiqib, bu taklif PSG talab qilayotgan 150 million yevrodan ancha past bo‘lishi tabiiy.
Sobiq himoyachi Stephen Warnock fikricha, Barcola – Iraola bu yozda “so‘rab olishi shart bo‘lgan” uchta yirik transferdan biri. Yangi murabbiyga kuchli qanotchi, yangi impuls va Salahdan keyingi davrni belgilaydigan futbolchi kerak.
Liverpool faqat Barcola bilan cheklanmayapti. Klub yana bir PSG yulduzi bilan ham bog‘lanmoqda, u bilan Iraola avval ham birga ishlagan, murabbiy uni yoqtirishi va transfer mantiqan to‘g‘ri kelishi aytilmoqda.
Savol endi bitta: Parij qanchaga tushishga tayyor va kim birinchi bo‘lib stolga jiddiy summa qo‘yadi? Anfieldmi yoki Old Trafford kutilmaganda sahnaga chiqadimi?
